Seısenbi kúni Qazaqstan Ulttyq quramasynyń fýtbolshylary men jattyqtyrýshylar shtaby Býharest qalasyna keldi. Qurama fýtbolshylary áýejaıdan túse salyp, 2018 jylǵy álem chempınatynyń irikteý kezeńi aıasyndaǵy Rýmynııa-Qazaqstan matchy ótetin Ploeshtı qalasyna at basyn tiredi.
Keshe qos qurama oıyn aldyndaǵy ashyq jattyǵý jıynyn ótkizdi. Alǵashqy bolyp Rýmynııa quramasynyń bas bapkeri Kosmın Kontra jergilikti jáne Qazaqstannan kelgen jýrnalısterdiń suraqtaryna jaýap berdi.
«Búgin Rýmynııa bapkeri retinde tuńǵysh matchymdy Qazaqstan quramasyna qarsy ótkizemin. Bul men úshin mańyzdy oıyn bolmaq. Sondaı-aq match Ploeshtı qalasynda ótetini jaqsy boldy. О́ıtkeni, jergilikti komandamen Rýmynııa kýbogyn jeńip alǵanmyn. Erteń de atalǵan qaladaǵy jeńisti jolymdy jalǵastyrǵym keledi», dedi ol.
Kosmın Kontranyń Rýmynııa quramasyna bas jattyqtyrýshy bolyp taǵaıyndalǵanyna eki apta bolsa da, Qazaqstan quramasynyń fýtbolshylaryn zerttep úlgergen eken. Jýrnalısterdiń «Qazaqstan fýtbolshylary týraly ne aıtasyz?», degen saýalyna: «Qazaqstan óte jaqsy qurama. Fızıkalyq turǵyda birneshe myqty fýtbolshylaryńyz bar. Erteńgi oıynda fýtbolshylaryńyz bizge biraz qıyndyq týdyratyny anyq. Biz barynsha joǵary dárejede oınap, oıyndy óz baqylaýymyzǵa alýǵa tyrysamyz. Eger, erteńgi matchta josparmyzdy júzege asyra almasaq, onda biz úshin tosynsyı bolmaq».
Rýmynııa quramasy byltyr Astanada ótken kezdesýde Qazaqstanmen teń oınaǵan bolatyn. Bas jattyqtyrýshy Kontranyń aıtýynsha, quramanyń jeńiske jetýine «Astana Arenadaǵy» jasandy alań kedergi bolǵan. «Byltyrǵy oıyn Rýmynııa úshin óte qıyn boldy. Qurama ol oıynǵa tolyq daıyn bolmaǵany kórinip turdy. Taǵy bir aıta keterligi, Astanadaǵy oıynǵa jasandy alańnyń da keri áseri boldy. Sondaı-aq Qazaqstan quramasynyń da óte jaqsy oınaǵanyn aıta ketken jón. Búgingi oıynda bizdiń qurama jeńiske jetedi dep oılaımyn», dedi bas jattyqtyrýshy.
Al Rýmynııa quramasynyń kapıtany jańa bapkerdiń qaramaǵynda jáne rýmyn fýtbolynyń jańa dáýirin jeńispen bastaǵysy keletinin aıtady. «Quramaǵa jańa bapkerdiń kelýi – jańa ózgeristedi, jańa baǵytty alyp keledi jáne ol fýtbolymyzdyń damýyna múmkindik beredi dep oılaımyn. Rýmynııa fýtbolynyń jańa dáýirin jeńispen bastaýymyz qajet. 2018 jylǵy álem chempıonatyna shyǵa almasaq ta, FIFA reıtınginde joǵarylaý úshin búgingi oıynda jeńiske jetýimiz kerek», dedi ol.
Budan keıin Qazaqstan Ulttyq quramasynyń bas bapkeri Aleksandr Borodıýk jýrnalısterdiń suraqtaryna jaýap berdi. Ulttyq quramanyń daıyndyǵy týraly sóz alǵan Borodıýk quramadaǵy birqatar tájirıbeli fýtbolshylardyń jaraqat jáne eskertý qaǵazdarynyń kóptigine baılanysty búgingi oıynǵa qatysa almaıtynyn aıtty. «Aldaǵy oıyndarǵa qatysa almaıtyn oıynshylarymyz bar. «Astanadan» Mýjıkov, Shomko, Mokın jaraqattaryna baılanysty ulttyq quramaǵa kómektese almaıdy. Bizge jigitterdiń densaýlyǵy mańyzdyraq. Sondyqtan olar óz klýbtarynda emdeletin bolady. Olardyń tezirek jazylyp ketýin tileımiz. Qosalqy quramda birneshe fýtbolshymyz bolǵan. Biraq, ókinishke qaraı olar da jaraqat alyp qaldy. Sondaı-aq ortalyq qorǵanysta sary qaǵaz ıelengen oıynshylarymyz bar. Sondyqtan osynyń bárin jan-jaqty eskerdik. Budan bólek, Georgıı Jýkovtyń, Baýyrjan Islamhannyń qatysa almaıtyny bizge qıyndaý bolyp tur. Degenmen bul fýtbol ekenin umytpaıyq. Munda bári de múmkin. Negizgi quramdaǵy oıynshylardyń ornyn ózge de jigitter laıyqty túrde basa alady. Ulttyq qurama jekelegen oıynshylardan emes, komandadan turady», dep atap ótti A.Borodıýk.
Málimet ornyna aıta ketsek, fýtboldan 2018 jylǵy álem chempıonatynyń irikteý kezeńindegi «E» tobynda synǵa túsip jatqan Rýmynııa jáne Qazaqstan quramalary byltyr elordadaǵy «Astana Arena» stadıonynda tuńǵysh ret oınap, teń eseppen tarqasqan.
Toptaǵy týrnır kestesinde Qazaqstan quramasy eki upaımen sońǵy orynda keledi. Al qarsylastarymyz Rýmynııa quramasy bolsa, toǵyz upaımen tórtinshi orynda. Bizdiń komanda toptaǵy sońǵy oıynyn 4-shi qyrkúıek kúni Polsha quramasyna qarsy oınap, 0:3 esebimen ese jibergen bolsa, Rýmynııa fýtbolshylary da ótken týrda upaı joǵaltty. Chernogorııada ótken matchta olar 0:1 esebimen jeńilgen. Halyqaralyq fýtbol federasııasynyń (FIFA) reıtınginde Qazaqstan quramasy tamyz aıyndaǵy jaǵdaımen salystyrǵanda 21 saty tómendep, 126-orynǵa tústi. Al Rýmynııa quramasy 41-orynda keledi.
Sonymen, eki quramanyń bas bapkeri de, fýtbolshylar da búgingi oıynǵa saqadaı saı. Endi tek oıyn bastalǵanyn kútip, ulttyq quramamyzdyń jeńiske jetkenin tileımiz.
Álı BITО́RE,
«Egemen Qazaqstan»
Rýmynııa,
Býharest
Sýret túsirgen Ilııas Omarov
